Një pistoletë lodër e harruar nga fëmijët mes luleve në shëtitoren e Sarandës ka ngritur në këmbë uniformat blu dhe shërbimet e Policisë Bashkiake, të cilat kanë rrethuar menjëherë zonën dhe kanë njoftuar grupin hetimor.
“Arma” është pikasur në orët e para të mëngjesit nga efektivë të Policisë Bashkiake të Sarandës, të cilët kanë siguruar menjëherë vendin e ngjarjes deri në mbërritjen e shërbimeve të Komisariatit të Policisë Sarandë.
Ekspertët dhe grupi hetimor kanë kryer veprimet e para proceduriale, duke menduar se arma e zjarrit ishte hedhur në lulishte për të fshehur gjurmët, pasi mund të ishte përdorur në ndonjë ngjarje kriminale.
Mirëpo, nga kontrolli i specialistëve ka rezultuar se arma ishte një pistoletë lodër dhe kishte ngjashmëri pothuajse perfekte, çka bëri që në momentin e parë të dyshohej se bëhej fjalë për një armë të vërtetë.
“Pistoleta” e gjetur nga policët e bashkisë në shëtitoren e Sarandës, në një lulishte të shëtitores “Naim Frashëri”, mbi plazhin “Centrali”, nuk ishte armë zjarri por armë lodër me sfera plastike.
