Ndarja nga jeta e aktores së njohur turke, Ece Irtem, ka tronditur opinionin publik, veçanërisht për faktin se ajo humbi jetën vetëm një ditë pas festimit të ditëlindjes së saj të 35-të.
Sipas raportimeve të para të mediave turke, aktorja u gjet pa shenja jete në banesën e saj në Turqi, ku si shkak paraprak i vdekjes u dyshua një infarkt.
Pas lajmit tragjik, në rrjetet sociale nisën të qarkullonin spekulime të ndryshme, ku pretendohej se vdekja e saj mund të kishte lidhje me një mbidozë ose me konsumimin e alkoolit.
Ngjarja mori një tjetër rrjedhë kur në media dhe në rrjet u përhap një deklaratë që pretendohej se ishte dhënë nga nëna e aktores.
Në këtë deklaratë thuhej: “Kur hyra në dhomën e saj në mëngjes, pashë një lëng të dyshimtë që i dilte nga goja. Ajo kishte konsumuar shumë alkool dhe po përdorte gjithashtu antidepresivë të fortë”.
Megjithatë, këto pretendime janë hedhur poshtë nga avokati i familjes, i cili ka përgënjeshtruar lajmet që po qarkullojnë duke theksuar se deklarata e publikuar nuk pasqyron faktet reale të ngjarjes.
Ai sqaroi se nëna e aktores nuk ka dhënë ende asnjë deklaratë zyrtare për autoritetet hetimore, pasi ndodhet në gjendje të rënduar emocionale dhe nën kujdes mjekësor pas humbjes së së bijës.