Një aksident është regjistruar pranë zonës turistike të Syrit të Kaltër, në territorin e Bashkisë Finiq, ku dy persona kanë përfunduar në një humnerë pasi humbën kontrollin e motorit me të cilin po udhëtonin.
Sipas informacioneve paraprake, njëri prej të lënduarve është shtetas i huaj. Të dy personat kanë rënë rreth 15 metra poshtë rrugës, në një terren të vështirë dhe të pjerrët, duke bërë të nevojshme ndërhyrjen e forcave të shpëtimit.
Menjëherë pas njoftimit, në vendngjarje mbërritën ekipet e Mbrojtjes nga Zjarri dhe Shpëtimi, strukturat e Policisë së Shtetit dhe Urgjenca Mjekësore, të cilat organizuan operacionin për nxjerrjen e të aksidentuarve nga humnera.
Fatmirësisht, pavarësisht rënies në thellësi, të dy personat kanë pësuar vetëm lëndime të lehta.
Pas shpëtimit, ata u transportuan me ambulancë drejt Spitalit të Sarandës, ku po marrin ndihmën e nevojshme mjekësore dhe po i nënshtrohen kontrolleve të mëtejshme.
Ndërkohë, autoritetet vijojnë hetimet për të sqaruar rrethanat e plota të aksidentit dhe shkaqet që çuan në daljen e motorit nga rruga.