Policia e Pogradecit ka proceduar penalisht tre mjekët e maternitetit të qytetit, të cilët janë vënë në lupën e drejtësisë pas vdekjes së 37-vjeçares shtatzënë, Marjana Karolina Bunaj.
Përmes një njoftimi zyrtar, policia ka bërë me dije se në kuadër të hetimeve për zbardhjen e plotë të kësaj ngjarje dhe në rast se ka pasur neglizhencë nga ana e bluzave të bardha, ata kanë bërë të mundur procedimin në gjendje të lirë të shtetasve: B. D., 35 vjeçe, banues në Elbasan, A. T., 40 vjeç, dhe S. Ç., 34 vjeç, të dy banues në Pogradec, me detyrë mjekë në maternitetin e Pogradecit.
“Specialistët për Hetimin e Krimeve të Komisariatit të Policisë Pogradec referuan materialet në Prokurori ku nisi procedimi penal për shtetasit: B. D., 35 vjeçe, banues në Elbasan, A. T., 40 vjeç, dhe S. Ç., 34 vjeç, të dy banues në Pogradec, me detyrë mjekë në maternitetin e Pogradecit.
Mbrëmjen e datës 30.08.2026, është paraqitur në maternitetin e Pogradecit, në gjendje jo të mirë shëndetësore, shtetasja M. K., 36 vjeçe, 7 muajshe shtatzënë. Pas ekzaminimit nga këta tre mjekë, 36-vjeçarja është nisur me autoambulancë, për ndihmë mjekësore të specializuar në një maternitet në Tiranë, por duke qenë se gjendja e saj shëndetësore është përkeqësuar gjatë rrugës, ajo është dërguar në maternitetin e spitalit të Elbasanit, ku u konstatua se kishte humbur jetën”, thuhet në njoftimin e Policisë.
Materialet procedurale iu referuan Prokurorisë së Korçës, për veprime të mëtejshme, për veprën penale “Neglizhenca në trajtimin mjekësor”.
Ngjarja tragjike u regjistrua ditën e djeshme, ku 37-vjeçarja e identifikuar si Marjana Karolina Bunaj, shtatzënë në muajin e shtatë, ndërroi jetë në spital, ndërsa familjarët e saj kanë bërë denoncim në polici, duke ngritur dyshime për neglizhencë mjekësore dhe vonesë në trajtim nga bluzat e bardha në Pogradec.
Marjana Karolina Bunaj, 37 vjeçe, me origjinë nga Mirdita, prej disa vitesh jetonte në Pogradec pas martesës. Ajo u paraqit rreth orës 1:00 të mëngjesit në maternitetin e qytetit, pasi kishte nisur të kishte dhimbje të forta barku.
Familjarët pretendojnë se pasi mjekët konstatuan rëndimin e gjendjes së saj u diskutua mundësia e transportimit drejt Tiranës me helikopter, për të marrë një trajtim më të specializuar. Por, sipas tyre transporti ajror nuk u realizua për shkak të orarit të natës.
Në këto kushte, rreth orës 04:30, rreth tre orë pas mbërritjes së saj në spital, mjekët vendosën transferimin e 37-vjeçares drejt Tiranës me ambulancë.
Por gjatë rrugës, gjendja e Marjana Karolina Bunajt u përkeqësua dhe pavarësisht ndihmës së bluzave të bardha ajo nuk arriti të mbijetonte.