Automjetet me peshë mbi 20 tonë do t’i nënshtrohen sërish kufizimit të përkohshëm të qarkullimit në autostrada të hënën, më 3 gusht, bëri të ditur Ministria e Infrastrukturës dhe e Transportit.
Sipas ministrisë, kjo masë është ndërmarrë duke u mbështetur në parashikimin zyrtar të temperaturave.
Kufizimi në autostrada do të zbatohet nga ora 11:00 deri në 17:30, për shkak se temperatura e parashikuar përmbush kriterin prej 32°C ose më shumë.
Ndërkaq, në rrugët nacionale, rajonale dhe lidhëse, automjetet do të mund të qarkullojnë pa kufizime.
Masa nuk përfshin automjetet e organeve të rendit dhe sigurisë publike, të shërbimeve emergjente dhe të institucioneve shëndetësore.
Ministria u bëri thirrje operatorëve dhe drejtuesve të automjeteve që ta zbatojnë kufizimin, duke e organizuar qarkullimin sipas orarit të caktuar.
