Protesta që prej më shumë se dy muajsh ka mbërthyer vëmendjen e opinionit publik, e njohur nga vetë pjesëmarrësit si “Revolucioni i Flamingove”, ka hyrë sot në ditën e saj të 63-të me një zhvillim të ri. Për herë të parë që nga nisja e kësaj lëvizjeje, janë mësuar emrat e tre personave që do të marrin përsipër organizimin dhe mbarëvajtjen e saj.
Kjo protestë, e cila nisi në mënyrë spontane pa frymëzues politikë apo figura drejtuese në krye, tashmë do të ketë tre përfaqësues publikë.
Lajmin e ka bërë të ditur vetë aktivisti Alben Kola, i cili konfirmoi se tre nismëtarët e kësaj lëvizjeje janë njohur zyrtarisht edhe nga autoritetet lokale. Emrat që do të mbajnë peshën e organizimit janë:
-
Luçiana Kokaj nga Rrjolli
-
Alben Kola nga Kukësi
-
Arlinda Lleshi nga Lezha
Një kapitull i ri për lëvizjen qytetare
Dalja e këtyre emrave shënon një kthesë në ecurinë e protestës, e cila deri më sot identifikohej vetëm si një reagim i lirë popullor pa emra të përveçëm. Sidoqoftë, organizatorët janë treguar të prerë duke nëvizuar se struktura e lëvizjes nuk do të ndryshojë: ajo mbetet një kauzë tërësisht qytetare.
“Marshimi është organizuar nga vetë të rinjtë, por nga sot do të kujdesemi ne për të, me qëllim që të shmangim incidentet si ato të mbrëmjes së kaluar. Nuk do të ketë më marshime jashtë Unazës,” u shpreh Kola.
Ky reagim erdhi pas tensioneve të një nate më parë, ku një grup protestuesish u shkëput nga grumbullimi kryesor dhe u drejtua drejt zonës së Rinasit. Përmes kësaj daljeje, organizatorët bënë thirrje për qetësi, maturi dhe unitet, duke kërkuar që marshimet e radhës të mbeten brenda kuadrit paqësor.