Marrëveshja për njohjen e lejeve të drejtimit mes Shqipërisë dhe Italisë do të zgjatet edhe për pesë vite të tjera, duke u mundësuar shqiptarëve që jetojnë në Itali dhe shtetasve italianë në Shqipëri të vijojnë procedurat për konvertimin e patentave.
Lajmi është bërë i ditur nga Ministria e Infrastrukturës, e cila ka sqaruar se qytetarët e të dy vendeve do të mund të përfitojnë nga kjo marrëveshje edhe gjatë periudhës së re të zbatimit.
Ky vendim lehtëson procedurat për personat që duhet të konvertojnë lejen e drejtimit në shtetin ku banojnë, duke u krijuar mundësinë të drejtojnë automjete pa pasur nevojë të pajisen me një leje të re përmes procedurave të zakonshme.
Vazhdimi i marrëveshjes përbën një tjetër hap në forcimin e marrëdhënieve mes Shqipërisë dhe Italisë, ndërsa ndihmon mijëra qytetarë që jetojnë, punojnë apo lëvizin mes dy vendeve.
