Protestat e studentëve dhe shoqërimi i të miturve në komisariate kanë sjellë një reagim nga drejtuesit e Policisë së Tiranës.
Përmes një shkrese të cilësuar “Tepër urgjent”, komisariateve të kryeqytetit dhe atij të Krujës u është kërkuar të tregojnë kujdes të veçantë gjatë ndërhyrjeve policore, veçanërisht në rastet kur përfshihen të mitur.
Shkresa, e firmosur nga zv/drejtori për Sigurinë Publike, kryekomisar Edmond Meshini, vjen pas situatave të krijuara nga protestat e fundit të studentëve dhe u kujton efektivëve detyrimin për respektimin e Kodit të Drejtësisë Penale për të Mitur.
Një nga porositë kryesore lidhet me shoqërimin e të miturve në ambientet e policisë. Drejtuesit kërkojnë që, në bashkëpunim me Bllokun e Sigurisë, të merren masa urgjente për menaxhimin e rasteve, me qëllim zvogëlimin e numrit të personave të mitur të mbajtur në këto ambiente dhe transferimin e tyre në ambiente të tjera, brenda kapaciteteve ligjore.
Vëmendje e veçantë i kushtohet edhe përdorimit të forcës gjatë protestave. Në dokument kërkohet që strukturat policore të njihen me aktet ligjore që rregullojnë përdorimin proporcional të forcës dhe gazit lotsjellës.
Një tjetër pikë e rëndësishme është kontrolli i telefonave celularë. Në shkresë theksohet se nuk duhet të kryhet asnjë kontroll i telefonave pa urdhër gjyqësor dhe asnjë kërkesë për fjalëkalime pa bazë ligjore. Për rastet që përfshijnë të mitur, kërkohet gjithashtu prania e prindit ose kujdestarit dhe psikologut, si dhe plotësimi i dokumentacionit përkatës përpara marrjes në pyetje.
Policia ka kërkuar edhe bashkëpunim me strukturat e teknologjisë së informacionit për sigurimin e kamerave në ambientet e shoqërimit dhe intervistimit, si dhe ruajtjen e pamjeve filmike deri më 19 tetor 2026. Në dokument kërkohet gjithashtu që çdo punonjës policie në detyrë të jetë lehtësisht i identifikueshëm, ndërsa automjetet e përdorura gjatë operacioneve të kenë numrat përkatës të identifikimit.
