Një aksident i rëndë ka ndodhur në orët e para të mëngjesit të kësaj të enjteje në Kretë të Greqisë, ku dy të rinj shqiptarë humbën jetën pas përplasjes së motorit me të cilin udhëtonin.
Mediat greke shkruajnë se aksidenti ndodhi rreth orës 03:00 të mëngjesit, kur motoçikleta me të cilën udhëtonin dy shtetas shqiptarë, të moshave 28 dhe 34 vjeç, doli nga rruga në rrethana ende të paqarta. Si pasojë, ata u përplasën me parmakun metalik dhe pësuan plagë të rënda.
Edhe pse u transportuan me shpejtësi me ambulanca drejt Spitalit të Hanias, dy të rinjtë nuk mundën t’u mbijetonin plagëve të marra dhe humbën jetën.
Ende nuk dihen shkaqet e aksidentit apo identiteti i viktimave, ndërsa policia greke po heton rrethanat e ngjarjes.
