Një alarm u dha në Poloni mëngjesin e së martës, kur një aeroplan që fluturonte nga Londra me 181 persona në bord u detyrua të bënte një ulje emergjente pas një kërcënimi për bombë.
Aeroplani devijoi drejtimin për në Aeroportin Varshavë-Modlin, rreth 40 kilometra në veri të qendrës së kryeqytetit polak. Aeroporti u mbyll deri në njoftim të mëtejshëm që shërbimet e sigurisë të kryenin kontrollet e nevojshme.
Sipas një deklarate nga menaxhmenti i aeroportit, ulja e paplanifikuar u bë pas informacionit në lidhje me praninë e një pajisjeje shpërthyese në aeroplan.
“Avioni u ul në mënyrë të sigurt dhe shërbimet e sigurisë po kontrollojnë kërcënimin e raportuar”, thuhet në deklaratë.
