Dy ish-zyrtare pranojnë lidhje me të burgosur të dënuar për trafik droge
Një skandal i rëndë ka tronditur sistemin penitenciar në Mbretërinë e Bashkuar, pasi dy ish-zyrtare të burgut Buckley Hall kanë pranuar në gjykatë se kanë krijuar marrëdhënie të papërshtatshme me të burgosur të dënuar për krime të rënda.
Bëhet fjalë për Jai Gascoyne (25 vjeçe) dhe Elle Walton (27 vjeçe), të cilat u paraqitën së bashku para Gjykatës Mbretërore të Manchesterit, ku pranuan fajësinë për shpërdorim të detyrës publike.
Sipas prokurorisë, Gascoyne pranoi dy akuza për shpërdorim të detyrës, pasi kishte krijuar një marrëdhënie me të burgosurin Dil Nawaz (30) dhe kishte komunikuar përmes telefonit edhe me një tjetër të burgosur, Michael Haigh.
Ndërkohë, Walton pranoi fajësinë për një akuzë të ngjashme, pasi kishte krijuar një marrëdhënie me Haq Nawaz (32), i cili po vuante dënimin në të njëjtin burg.
Gjatë seancës gjyqësore nuk u dhanë detaje të hollësishme mbi natyrën e marrëdhënieve mes ish-zyrtareve dhe të burgosurve, ndërsa hetimet kanë zbuluar se ngjarjet dyshohet të kenë ndodhur në periudhën janar – prill 2024.
Në proces janë përfshirë edhe vëllezërit Dil Nawaz dhe Haq Nawaz, të cilët akuzohen se kanë nxitur ose ndihmuar në kryerjen e veprës penale të shpërdorimit të detyrës publike. Ata morën pjesë në seancë përmes lidhjes video dhe mbeten në paraburgim.
Gjyqtarja Judge Johnston vendosi që dy ish-oficeret të mbeten të lira me kusht deri në shpalljen e dënimit, por paralajmëroi se kjo nuk nënkupton se ato do të shmangin burgimin.
“Të gjitha opsionet mbeten të hapura”, u tha gjyqtarja të pandehurave, duke bërë të ditur se para vendimit përfundimtar do të kërkohen raporte paraprake për dënimin.
Rasti bëhet edhe më i rëndë për shkak të profilit të të burgosurve me të cilët dyshohet se kishin krijuar marrëdhënie.
Haq Nawaz ishte dënuar me 13 vjet e 10 muaj burg, ndërsa Dil Nawaz me 12 vjet burg, pasi në shtator të vitit 2023 u shpallën fajtorë për drejtimin e një grupi të organizuar kriminal së bashku me vëllain e tyre, Asim Nawaz.
Sipas autoriteteve britanike, grupi kriminal kishte shpërndarë kokainë dhe heroinë me një vlerë të përllogaritur ndërmjet 2.15 dhe 3.1 milionë paund, gjatë një periudhe 12-mujore.
Skandali ka ngjallur debat të gjerë në Britani mbi sigurinë në institucionet korrektuese dhe marrëdhëniet e papërshtatshme mes personelit të burgjeve dhe të dënuarve, ndërsa pritet që gjykata të japë vendimin përfundimtar për të gjithë të pandehurit pas përfundimit të procedurave gjyqësore.