Elon Musk po ngre zërin kundër këshilltarit kryesor të tregtisë së Trump, Peter Navarro, në mbrojtje të Teslës.
“Tesla prodhon shumicën e makinave amerikane. Navarro është më budalla se një thes me tulla”, shkroi Musk në X.
Në një postim tjetër, ai vazhdoi: “Navarro është me të vërtetë një idiot. Ajo që ai thotë është dukshëm e rreme. Me çdo përkufizim që e shikoni, Tesla është prodhuesi më i kompletuar i makinave në Amerikë, me përqindjen më të lartë të pjesëve amerikane të përdorura”, shtoi ai.
Komentet e Musk erdhën si përgjigje ndaj intervistës së Navarro me CNBC të hënën, në të cilën ai pretendoi se Musk nuk është një prodhues makinash, por një “montues” i thjeshtë, pasi automjetet Tesla përbëhen nga pjesë të marra nga jashtë.
Disa ditë më parë, në një postim që më vonë e fshiu, Musk kishte shkruar se Navarro “nuk ka ndërtuar asgjë…” Në një postim tjetër, ai vuri hapur në dyshim kualifikimet e tij, duke theksuar: “Një doktoraturë në ekonomi nga Harvard është një dobësi, jo një avantazh”.
Sekretarja e shtypit të Shtëpisë së Bardhë, Caroline Levitt, u shfaq e patrazuar nga sulmet publike të Musk ndaj një zyrtari qeveritar.
“Sido qoftë, ne jemi qeveria më transparente në histori, i shprehim hapur mosmarrëveshjet tona”, iu përgjigj ajo një gazetari që e pyeti për sulmet e Musk ndaj Navarros.