Ish-ministri i Shëndetësisë, Ilir Beqaj, është kthyer në qelinë e tij në burgun e Durrësit pas një trajtimi mjekësor në Qendrën Spitalore Universitare “Nënë Tereza” (QSUT). Burime pranë Drejtorisë së Burgjeve konfirmuan se ai u kthye në Institutin e Ekzekutimit të Vendimeve Penale (IEVP) pas stabilizimit të gjendjes së tij shëndetësore.
Beqaj u dërgua në spital pas shfaqjes së një alergjie akute, shoqëruar me temperaturë të lartë dhe një infeksion të rëndë në lëkurë. Ai u trajtua në shërbimin e alergologjisë dhe, sipas burimeve, gjendja e tij është stabilizuar.
Beqaj ndodhet nën masën e sigurisë “arrest në burg” prej rreth një viti, lidhur me dosjen SASPAC. Ai është gjithashtu i pandehur në procesin gjyqësor për çështjen e njohur si “Sterilizimi”, ku akuzohet se ka nënshkruar një kontratë koncesionare në kundërshtim me ligjin, duke shmangur konfliktin e interesit me biznesmenin Ilir Rrapaj.
Në qershor, SPAK-u kërkoi nga Gjykata e Posaçme që të deklarojë fajtorë tetë bashkë të pandehurit e Beqajt, të cilët po gjykohen në një proces të veçuar nga ai.