Ministri i Ekonomisë, Hekuran Murati, ka njoftuar për një arritje historike në fushën e financave publike në Kosovë. Sipas tij, Administrata Tatimore e Kosovës (ATK) ka arritur për herë të parë të mbledhë mbi 1 miliardë euro tatime brenda një viti fiskal.
Ky rekord është shënuar më 16 dhjetor, pra ende pa përfunduar viti fiskal, duke dëshmuar rritje të konsiderueshme të performancës në mbledhjen e tatimeve dhe formalizimin e ekonomisë.
Murati theksoi se brenda vetëm pesë viteve, mbledhja e tatimeve është më shumë se dyfishuar, nga 467 milionë euro në mbi 1 miliardë euro, çka sipas tij paraqet një sukses të rëndësishëm institucional dhe ekonomik.
Po ashtu, ministri bëri të ditur se gjatë kësaj periudhe janë shënuar rritje edhe në tregues të tjerë ekonomikë. Qarkullimi i bizneseve është rritur nga 12 miliardë euro në 25 miliardë euro, fitimi i korporatave nga 900 milionë euro në 2.3 miliardë euro, ndërsa numri i vendeve të punës ka arritur nga 350 mijë në 435 mijë.
“Edhe një lajm i mirë”, ka shkruar Murati, duke e cilësuar këtë sukses si dëshmi të zhvillimit ekonomik dhe forcimit të kapaciteteve shtetërore në menaxhimin e financave publike.