Gjykata e Gjilanit ka caktuar një muaj paraburgim për Brahim Demirin, i dyshuari kryesor për vrasjen e djalit të tij, Adonis Demirit, dhe për veprën penale të armëmbajtjes pa leje.
Referuar njoftimit të bërë nga Gjykata, mësohet se masa e paraburgimit është caktuar pas aprovimit të kërkesës së Prokurorisë Themelore në Gjilan.
Ngjarja e rëndë ndodhi më 1 nëntor 2026, pas mesnatës, në shtëpinë e familjes në fshatin Demiraj të Gjilanit.
Sipas hetimeve të bëra nga Prokuroria, Brahim Demiri, pas një konflikti fizik me të birin, Adonis Demirin, i ka marrë atij jetën.
Njëkohësisht, brenda të njëjtës shtëpi është gjetur pa shenja jete edhe foshnja D.D., në trupin e të cilës u konstatuan shenja dhune, në shtratin e babait të saj, të ndjerit Adonis Demiri. Në vendin e ngjarjes u konstatuan dhe njolla të shumta gjaku.
Prokuroria dyshon se nga këto veprime janë privuar nga jeta dy anëtarë të së njëjtës familje.
Gjyqtari i procedurës paraprake ka vlerësuar se ekzistojnë arsyet ligjore për caktimin e paraburgimit, duke theksuar rrezikun që i pandehuri, po të lihej i lirë, të mund të ndikonte te dëshmitarët me qëllim të koordinimit të deklarimeve dhe minimizimit të pasojave të veprimeve të dyshuara.
“Në kërkesën e prokurorisë për caktim të masës së paraburgimit është pretenduar se i pandehuri B. D. me datë 1 nëntor 2026, në periudhën kohore pas orës 00:27 e deri në orët e mëngjesit, në shtëpinë e tij në fshatin Demiraj, Komuna e Gjilanit, pas një konflikti fizik me djalin e tij e privon nga jeta A. D., ndërsa më parë edhe fëmija D. D., është gjetur e pa jetë dhe me shenja dhune në shtratin e babait të saj, tani të ndjerit A. D., ku janë vërejtur edhe njolla gjaku, krejt këto të shkaktuara me dyshimin nga babai i saj tani i ndjeri A., ashtu që nga veprimet e të njëjtëve janë privuar nga jeta dy anëtar të familjes së tyre.“, njofton gjykata.
Ndërkaq mësohet se familja ka hapur dyert për ngushëllime, ndërsa hetimet për zbardhjen e plotë të ngjarjes vazhdojnë.
Vdekja e 27-vjeçarit dhe foshnjës së tij ka shkaktuar tronditje të madhe në Gjilan, pasi dyshimet janë se i riu vrau foshnjën e tij, në këto rrethana babai i mori jetën këtë të fundit, duke regjistruar kështu dy krime brenda familjes. Ndërsa pritet që autoritetet të sqarojnë rrethanat e kësaj ngjarjeje të rëndë.
