Skema e pensioneve në Shqipëri vijon të përballet me sfida, për shkak të numrit të ulët të kontribuuesve në raport me përfituesit, por të ardhurat nga kontributet shoqërore dhe shëndetësore po shënojnë rritje të vazhdueshme. Sipas të dhënave zyrtare të Ministrisë së Financave, gjatë periudhës janar-shtator 2026, në arkën e shtetit janë mbledhur mbi 150.9 miliardë lekë, ose rreth 1.65 miliardë euro, nga kontributet e të punësuarve në sektorin publik dhe privat.
Të ardhurat janë rritur me 15.9 miliardë lekë, ose 13.5%, krahasuar me të njëjtën periudhë të vitit 2025. Ndërkohë, realizimi i planit për 9-mujorin ka arritur në 100.5%. Krahasuar me vitin 2016, kur të ardhurat nga kontributet ishin 57.3 miliardë lekë, shuma e mbledhur në 9 muajt e parë të vitit 2026 është rritur me 163.35%. Sipas të dhënave, kjo është shifra më e lartë e regjistruar në dekadën e fundit.
Rritja e të ardhurave nga kontributet lidhet me disa faktorë, mes tyre shtimi i numrit të kontribuuesve, rritja e pagave dhe masat për formalizimin e tregut të punës.Gjatë vitit 2025, në skemën e sigurimeve shoqërore janë shtuar mbi 31 mijë kontribuues, duke e çuar numrin e përgjithshëm në 836,910. Ky zgjerim i bazës së kontribuuesve ka ndikuar në rritjen e të ardhurave të mbledhura.
Një tjetër faktor është rritja e pagave në sektorin publik dhe privat. Paga mesatare në vend i është afruar nivelit të 1,000 eurove në muaj, duke rritur edhe shumën e kontributeve shoqërore dhe shëndetësore që paguhet për çdo të punësuar.
Ndikim kanë pasur edhe masat për formalizimin e tregut të punës, përmes kontrolleve ndaj nëndeklarimit të pagave dhe përpjekjeve për të afruar pagat e deklaruara me të ardhurat reale. Kjo ka zgjeruar bazën mbi të cilën llogariten kontributet, ndaj një pjesë e rritjes së arkëtimeve lidhet edhe me përmirësimin e deklarimit të pagave dhe punësimit.
