Përditësohet bilanci i aksidentit të rëndë të ndodhur në autostradën Tiranë-Durrës, ku një autobus doli nga rruga dhe u përmbys. Sipas autoriteteve shëndetësore, deri më tani konfirmohet një viktimë dhe 12 persona të plagosur.
Shefi i Urgjencës së Traumës, Agustin Suma, deklaroi se viktima është drejtuesi 36-vjeçar i autobusit, i cili mbërriti në spital pa shenja jete.
Mes të plagosurve ndodhen edhe dy fëmijë. Njëri, rreth 8-9 vjeç, është në gjendje të rëndë, ndërsa tjetri, 14 vjeç, po mbahet nën observim.
Sipas Sumës, pesë pacientë të moshës 30 deri në 50 vjeç po i nënshtrohen ndërhyrjeve kirurgjikale. Dy prej tyre janë shtetas të huaj, identiteti i të cilëve nuk është konfirmuar ende, dhe ndodhen në gjendje të rëndë.
Ndërkohë, pesë të plagosur të tjerë janë në gjendje të stabilizuar dhe nuk paraqesin rrezik për jetën.
“Janë 2 të mitur, një i moshën 8-9 në gjendje të rëndë, një tjetër 14 vjeç në repartin e observimit. 5 pacientë 30-50 vjeç po i nënshtrohen operacionit. 2 prej tyre janë shtetas të huaj, identiteti i të cilëve nuk janë konfirmuar ende. Ndodhen në gjendje të rëndë. 5 të tjerë janë në gjendje të stabilizuar në urgjencë. Këta të pesë nuk paraqesin rrezik për jetën. Ekipi mjekësor po ndjek nga afër ecurinë klinike të çdo pacienti”, tha ai.