Bashkë më nisjen e këtij viti të ri shkollor, ka nisur edhe trafiku i rënduar në kryeqytet. Rrugët e Tiranës janë të tejmbushura me makina, ku një situatë kaotike është raportuar të jetë regjistruar në zonën e Unazës së Madhe, nga Liqeni deri në afërsi të Paskuqanit.
Qindra qytetarë janë përballur me vështirësi në qarkullim, ndërsa automjetet lëvizin me ritëm të ngadaltë në disa prej segmenteve të këtij aksi kryesor të kryeqytetit. Po ashtu edhe në rrugë të tjera brenda Tiranës, është konstatuar trafik dhe vështirësi në qarkullim.
Një prej faktorëve që ka ndikur në rëndimin e trafikut është edhe nisja e vitit të ri shkollor në sistemin parauniversitar. Fluksi i madh i automjeteve në orët e para të mëngjesit, vjen pasi prindërit shoqërojnë fëmijët drejt institucioneve arsimore dhe qytetarët nisen për në punë.
