Një lajm i kobshëm është mësuar ditën e sotme pasi ka mbyllur sytë përgjithmonë në moshën 77-vjeçare profesor Qazim Dushku.
I njohur si një nga kontribuesit më të mëdhenj të arsimit, kryesisht në zonën e Lezhës ku ai shërbeu me dinjiteti për vite me radhë si mësues dhe drejtor arsimi, largimi i profesor Qazimit ka lënë pas një plagë të pashërueshme për familjen dhe të gjithë njerëzit që arritën ta njihnin ndër vite.
Lajmi i trishtë është mësuar nga reagime të bëra në rrjet nga të afërmit e profesor Qazimit të cilët kanë njoftuar humbjen tragjike të njeriut të tyre.
Profesor Qazimi lindi në Lezhë në vitin 1949. Shkollën 7-vjeçare dhe gjimnazin i kreu në vendlindje. Në vitin 1972 Qazim Dushku përfundoi studimet në Universitetin e Tiranës. Ndërsa studimet pasuniversitare për pedagogji dhe psikologji Dushku i kreu ne vitin 1982.
Gjatë vitete të karrierës së tij disavjeçare Dushku ka shërbyer si mësues, drejtor shkolle, drejtor arsimi, specialist dhe studiues.
Po ashtu ai ka qenë përgjegjës i Seksionit të Arsimit, inspektor në seksionin e arsimit, drejtor i gjimnazit “Hydajet Lezha” si dhe drejtor i Drejtorisë Arsimore Rajonale Lezhë.
Përveç kontributit të dhënë në mësimdhënie, Dushku do të mbahet mend për kontributin e dhënë në dhjetëra artikujt problemor e studimorë në revistat kulturore e shkencore të kohës si dhe bashkëpunëtor i rregullt i shtypit pedagogjik.
Disa nga veprat e Prof.Qazim.Dushkut:
• Rini e përhershme
• Shoqëri e trazuar
• Patriarku i arsimit të Lezhës
• Kriza e dashurisë
• Për një mësim dhe edukim ndryshe.
• Në gjurmët e krimit familjar.
• Arsimi dhe reforma
• Dashuria, martesa dhe jeta seksuale
• Njerezit e mi në rrjedhen e historisë
• Motivimi
• Arsimi dhe reforma
• Më të mirët ndër vite
• Një jetë kushtuar dijes dhe pajtimit
• Mos i vrisni fëmijët etj.
Mësohet se familja Dushku do t’i japë lamtumirën e fundit profesorit, ditën e nesërme më 1 korrik në orën 10:00 të mëngjesit, në varrezat e Sharrës.
Newsbomb.al i shpreh ngushëllime familjarëve, miqve dhe kolegëve për humbjen tragjike të njeriut të tyre të zemrës.
