Një turist gjerman ka pësuar lëndime në zonën e njohur si “Maja e Rosit” në Valbonë, pasi është rrëzuar gjatë eksplorimit të zonës. Lajmi u bë i ditur nga policia lokale, e cila menjëherë organizoi një operacion kërkimi për të gjetur dhe ndihmuar turistin e lënduar.
Sipas njoftimit të policisë së Tropojës, rreth orës 13:15, është marrë një njoftim se një shtetas gjerman, duke vizituar Alpet e Valbonës, ishte rrëzuar dhe kishte dëmtuar këmbën. Shërbimet e Komisariatit të Policisë Tropojë, së bashku me ekipin mjekësor të spitalit të Tropojës, u nisën menjëherë drejt vendit të ngjarjes.
Pas një kërkimi që zgjati rreth dy orë, forcat e policisë arritën të lokalizojnë turistin gjerman 68-vjeçar. Ai u transportua nga policia deri në rrugën e makinave dhe më pas u dërgua me autoambulancë në Spitalin e Tropojës.
Policia ka konfirmuar se turisti ndodhet në spital dhe fatmirësisht është jashtë rrezikut për jetën. Drejtoria Vendore e Policisë Kukës ka theksuar angazhimin maksimal të strukturave të saj për të garantuar rendin dhe sigurinë, si dhe për të ofruar ndihmë qytetarëve, vizitorëve dhe turistëve në rast nevoje.