Një tërmet me magnitudë 5.6 goditi Tajvanin të enjten në mëngjes, duke tronditur ndërtesat dhe duke shkaktuar disa dëme të vogla. Epiqendra ishte në Dapu, në qarkun Chiayi, rreth 250 km në jug të kryeqytetit Taipei. Pas tërmetit, pati disa pasgoditje, të cilat ishin vazhdim i një tërmeti më të madh me magnitudë 6.4 që ndodhi më 21 janar, duke lënduar lehtë 15 persona dhe duke dëmtuar ndërtesa e ura.
Edhe pse nuk u raportuan të lënduar nga tërmeti i fundit, autoritetet kryen inspektime sigurie, pezulluan përkohësisht shërbimin e trenave dhe larguan mbeturinat e rëna nga ndërtesat. Lajmi vjen gjatë festimeve të Vitit të Ri Hënor, një periudhë me lëvizje të mëdha të udhëtarëve.
Ekspertët paralajmërojnë se Tajvani po kalon një periudhë aktiviteti sizmik të shtuar, e cila mund të sjellë më shumë pasgoditje apo tërmete të rinj, megjithëse jo domosdoshmërisht të fuqishëm. Ishulli ndodhet në “Unazën e Zjarrit” të Paqësorit, një zonë me aktivitet të lartë sizmik.
Tajvani ka përvojë me tërmete shkatërruese, si ai i vitit 1999 me magnitudë 7.7, që la mbi 2,400 të vdekur dhe solli rregulla më të forta ndërtimi dhe përmirësim të protokolleve të reagimit ndaj tërmeteve.
Në shkolla dhe vende pune zhvillohen ushtrime të rregullta për mbrojtjen nga tërmetet, dhe telefonat celularë dërgojnë paralajmërime kur ndihen lëkundje të forta.