Një aksident tragjik ndodhi mbrëmjen e djeshme në aksin rrugor “Qafë Mali–Fierzë”, ku ka humbur jetën Prendush Kola, 51 vjeç, i cili punonte si punonjës i mirëmbajtjes së rrugës.
Ngjarja ndodhi në vendin e quajtur “Shkëmbi i Dardhës”, ku mjeti që drejtohej nga Kola humbi kontrollin, doli nga rruga dhe përfundoi në një humnerë.
Dinamika dhe Momenti i Fundit
Banorët e zonës, pasi dëgjuan zhurmën e aksidentit rreth orës 22:00, nisën menjëherë kërkimet dhe e gjetën Kolën të plagosur rëndë, por ende gjallë.
Sipas raportimeve në media, në momentet e fundit, 51-vjeçari u ka kërkuar falje banorëve që i kishte shqetësuar në atë orë të mbrëmjes. Pavarësisht përpjekjeve për t’i dhënë ndihmë, Kola ndërroi jetë si pasojë e plagëve të shumta.
Policia e Shtetit konfirmoi ngjarjen:
“Mbrëmjen e djeshme, në aksin rrugor ‘Qafë Mali–Fierzë’, shtetasi P. U., 51 vjeç, duke drejtuar automjetin e tij, dyshohet se ka humbur kontrollin mbi drejtimin e automjetit, i cili ka dalë nga rruga dhe ka rënë në një humnerë. Menjëherë pas marrjes së njoftimit, në vendngjarje kanë shkuar shërbimet e Policisë, forcat zjarrfikëse dhe ambulanca, por shtetasi P. U. ka humbur jetën si pasojë e plagëve të marra.”
Grupi hetimor po punon për të zbardhur shkaqet e plota të daljes së mjetit nga rruga dhe rënies në humnerë.