Seanca e parë e legjislaturës së re në Kuvendin e Shqipërisë ka nisur me debate dhe tensione të forta, duke sinjalizuar një qëndrim të ashpër të opozitës. Deputetët e Partisë Demokratike shpalosën që në fillim pankarta me akuza ndaj eksponentëve kryesorë të Partisë Socialiste.
Berisha: “Kryesuesi nuk lexoi emrat e deputetëve të vërtetë të partisë së krimit”
Pas ngritjes së komisionit për verifikimin e mandateve, kreu i PD-së, Sali Berisha, kërkoi fjalën për procedurë. Fjalimi i tij u ndërpre, ç’ka shkaktoi një debat të ashpër.
“Kryesuesi i seancës nuk lexoi emrat e Bajrit, Pëllumb Gjokës. Nuk i lexoi emrat e deputetëve të vërtetë të partisë së krimit, por vetëm presto nomet,” tha Berisha.
Në momentin kur deputetë opozitarë u mblodhën rreth foltores, drejtuesi i seancës, Vasil Llajo, kërkoi respektimin e rregullores. Megjithatë, Taulant Balla urdhëroi ndërprerjen e fjalës së Berishës, duke e lënë fjalimin e tij të papërfunduar.
Akuzat ndaj Ramës dhe kryesuesit të seancës
Pas seancës, Berisha mbajti një deklaratë për mediat ku e quajti ngjarjen “skandal” dhe e akuzoi Ramën se po “shkelmon rregulloren e Kuvendit”.
“Ky është një narkoparlament,” tha Berisha. “Ka një rregullore. Asnjë komision nuk ndryshohet pa ndryshuar rregulloren.”
Ai kritikoi gjithashtu Vasil Llajon, duke e quajtur atë një mjek “pa eksperiencë parlamentare” dhe që po mashtrohet. “Ai asgjësoi edhe rregulloren e parlamentit,” shtoi Berisha.
Në seancë ishin të pranishëm edhe përfaqësues të ambasadave të huaja dhe komuniteteve fetare në Shqipëri.