Moderatorja e njohur shqiptare, Kiara Tito, e cila prej kohësh është kthyer në një figurë të dashur për publikun, ka ndarë së fundmi një nga kujtimet më sfiduese të karrierës së saj televizive.
E ftuar në emisionin “Ndryshe” në Top Albania Radio, Kiara u kthye pas në kohë për të rrëfyer përvojën e saj në një nga formatet më të ndjekura të humorit në Shqipëri – “Portokalli”. Megjithëse sot ajo shquhet për vetëbesimin dhe energjinë në ekran, rrugëtimi i saj nuk ka qenë i lehtë. Kiara tregoi se momentet e para në këtë skenë të madhe kanë qenë të mbushura me pasiguri, presion dhe emocione të forta.
“Pjesa më e vështirë për mua ishte pak para daljes në skenë,” – kujton Kiara. “Në ‘Portokalli’ kemi disa dalje, nuk dalim gjithmonë nga e njëjta anë. Aktorët e tjerë ishin mësuar me ritmin, me lëvizjet, me vendet nga duhet të dilje. Por për mua, si fillestare, ishte konfuzion total.”
Sipas saj, një nga momentet më stresuese ndodhi kur i duhej të lëvizte me shpejtësi nga një cep i skenës në tjetrin për një dalje të menjëhershme. Nuk kishte orientim të qartë – dikush i thoshte të shkonte majtas, një tjetër djathtas – ndërsa ajo përpiqej të mbante mend edhe tekstin që duhej të interpretonte përpara një publiku të madh.
“Më çakordoi fare. Desh më zuri paniku. Ishte ajo ndjesia kur ke një peshë në kraharor dhe nuk di nga të shkosh. Gjithçka ndodhte shumë shpejt, dhe për një moment nuk dija ku isha.”
Megjithatë, Kiara tregoi se me kalimin e kohës dhe me përvojën e fituar në emision, ajo arriti ta kalonte këtë pasiguri. Ajo u përshtat me ritmin intensiv të spektaklit dhe nisi të gëzonte çdo dalje në skenë, duke fituar më shumë siguri në vetvete dhe kontroll mbi emocionet.
“Portokallia më ndihmoi të rritem profesionalisht. Ishte një shkollë më vete – dinamike, e lodhshme, por shumë e vlefshme. Kam mësuar të përballoj presionin dhe të jem e pranishme në momentin e duhur.”
Ky rrëfim i sinqertë i Kiara Titos është përjetuar me shumë empati nga publiku, sidomos nga të rinjtë që ndjekin rrugën e saj dhe që shpesh nuk e dinë se sa sfiduese mund të jenë kulisat e botës së televizionit.