Një ngjarje e rëndë është regjistruar mbrëmjen e kësaj të premte në Vlorë, ku një nënë ka përplasur në tokë fëmijën e saj 5 muajshe.
Ngjarja ka ndodhur në lagjen “Pavarësia”, teksa bëhet fjalë për një grua rreth 35-vjeçe, e cila dyshohet se në gjendje të dehur ka përplasur disa herë në trotuar foshnjën e saj.
Qytetarët e pranishëm aty dhe forcat e Policisë kanë ndërhyrë për t’i marrë fëmijën dhe ajo i ka kundërshtuar me forcë.
Foshnja është dërguar në spital për kontrolle mjekësore dhe sipas policisë nuk ka dëmtime të dukshme. Megjithatë, po i bëhet një skaner për të vlerësuar gjendjen e organeve të brendshme.
Ndërkohë, nëna e fëmijës është shoqëruar në polici dhe po merret në pyetje. Burime bëjnë me dije se ajo është e divorcuar.