Pesë adoleshentë, të moshave 15 dhe 17 vjeç, janë arrestuar nga Policia e Tiranës pas një sherri të dhunshëm me armë të ftohta, që la 3 persona të plagosur. Ngjarja ndodhi në rrugën “Ali Begeja” rreth orës 19:50. Të plagosurit, Ahmed Agolli (22 vjeç), Hendri Rasa (19 vjeç) dhe Klaus Miha (19 vjeç), u dërguan në spital, por ndodhen jashtë rrezikut për jetën.
Si nisi konflikti?
Sipas hetimeve, sherri ka nisur një natë më parë. Të miturit po konsumonin hashash pranë një lokali, kur të rinjtë e plagosur u kërkuan atyre të largoheshin. Të nesërmen, adoleshentët u kthyen me një grup prej rreth 15 personash të maskuar, të cilët sulmuan të rinjtë brenda lokalit.
Policia ka identifikuar vetëm 5 nga sulmuesit kryesorë, ndërsa po punohet për identifikimin e të tjerëve. Në vendngjarje u sekuestruan dy armë të ftohta, që besohet se janë përdorur gjatë konfliktit.
Policia e Tiranës ka konfirmuar arrestimet, duke thënë se pesë të miturit akuzohen për goditjen me armë të ftohta të tre të rinjve të tjerë.