Klejvis Metalla, një 24 vjeçar me banim në Tiranë, është arrestuar nga Interpoli në Beograd pasi ishte shpallur në kërkim nga autoritetet shqiptare. Ai akuzohet se ka dhunuar rëndë bashkëjetuesen e tij, e cila ka qenë dhe shtatzënë.
“Në vijim të bashkëpunimit ndërmjet specialistëve të Interpol Tiranës dhe specialistëve të Interpol Beogradit, u arrestua provizorisht në Serbi, në vijim të operacionit “The Wanted”, shtetasi shqiptar, Klejvis Metalla, 24 vjeç.
Ai ishte shpallur në kërkim ndërkombëtar, pasi në muajin mars 2025, Gjykata e Dibrës i caktoi masën e sigurisë “Arrest në burg”, për veprën penale “Plagosja e rëndë me dashje”. 24-vjeçari akuzohet se në muajin janar 2025, dhunoi rëndë bashkëjetuesen e tij shtatzënë”, njofton Policia.
Ditën e dhunës, më 27 Janar 2025 në orën 15:30, vajza e re bashkë me të vëllain 5 vjeç u gënjye dhe hipi në makinë me Klejvisin pasi ky i fundit i kishte marrë pasaportën. Jashtë qytetit në vendin e quajtur “Gurët e Skënderbeut”, ai ka ndaluar makinën dhe ka zbritur vajzën, duke e goditur me shkelma në bark dhe në trup.
Sipas mjekut gjinekolog që ka ndjekur rastin, si pasojë e dhunës barbare fëmija është abortuar për të shpëtuar vajzën e re, që në momentin kur ka ndodhur ngjarja ka qenë 23 vjeçe.
Autoritetet ligjzbatuese bëjnë me dije se Interpol Tirana është njoftuar nga Interpol Beogradi për arrestimin e Klejvis Metallës dhe në vijim të bashkëpunimit, pritet ekstradimit i 24 vjeçarit në Shqipëri, për t’u përballur me akuzat.
Rasti ka tronditur opinionin publik muaj më parë, pasi është trajtuar nga emisioni investigativ “STOP”, i cili i dha zë partneres së Klejvis Metallës, e cila tregoi se ai ishte nevrikosur kur e reja kishte mbetur shtatzënë dhe kishte ushtruar dhunë barbare mbi të.