Procesi i zgjedhjes së kreut të ri të SPAK ka sjellë jo vetëm diskutime të forta publike, por edhe skena që kanë ndodhur larg kamerave. I ftuar në një emision televiziv, gazetari Eni Ferhati, i cili ndoqi nga afër mbledhjen e Këshillit të Lartë të Prokurorisë këtë të enjte, rrëfeu një episod domethënës gjatë numërimit të votave që çuan Klodian Brahon drejt fitores.
Sipas Ferhatit, atmosfera në sallë ishte e tensionuar teksa po numëroheshin votat njëra pas tjetrës. Fillimisht, votat u ndanë në mënyrë të barabartë: 3 për Brahon dhe 3 për kandidatin tjetër, Altin Xholi, duke krijuar idenë se procesi mund të shkonte drejt një balotazhi.
Mirëpo, situata ndryshoi menjëherë pas votës së gjashtë. Ferhati tregon se çdo votë pasuese shkoi për Klodian Brahon:
4 me 3
5 me 3
6 me 3
“Momenti ishte kulminant,” – tha gazetari. – “Në çastin kur u hodh vota vendimtare dhe u kuptua qartë se Braho po e merrte drejtimin e SPAK, pashë një episod interesant.
Një nga ambasadorët e pranishëm, pothuajse sa nuk hodhi bërrylin për t’i dhënë sinjal një ambasadori tjetër, me mesazhin e qartë: ‘Puna u krye’. Ishte një reagim i menjëhershëm, një lloj komunikimi i heshtur që tregonte kënaqësinë për rezultatin.”
Ferhati theksoi se nuk bëhej fjalë për interpretime personale, por për një situatë që ai e kishte parë vetë, si dëshmitar i drejtpërdrejtë në sallë – një moment i shkëputur nga vëmendja e kamerave dhe i paekspozuar deri më tani.
Ky koment ka ngjallur reagime dhe interpretime të shumta, sidomos mbi nivelin e ndikimit që partnerët ndërkombëtarë mund të kenë pasur në procesin e zgjedhjes së kreut të SPAK. Për momentin, asnjë nga ambasadat nuk ka bërë një deklaratë publike mbi këtë episod.