Një incident i rëndë raportohet të ketë ndodhur brenda ambienteve të Drejtorisë Rajonale të Transportit Rrugor në Shkodër, ku një punonjës i institucionit është dhunuar fizikisht nga dy persona gjatë orarit zyrtar të punës.
Bëhet fjalë për Revi Gokajn, punonjës i këtij institucioni prej rreth një viti dhe djali i prokurorit të SPAK, Elvin Gokaj.
Sipas të dhënave paraprake, dy persona kanë hyrë brenda ambienteve të drejtorisë dhe kanë goditur Gokajn, duke i shkaktuar dëmtime në fytyrë. Ngjarja dyshohet se ka ndodhur në prani të punonjësve të tjerë dhe qytetarëve që ndodheshin në institucion.
Ende nuk dihen motivet e dhunës. Nuk është e qartë nëse konflikti lidhet me detyrën e Revi Gokajt në Drejtorinë e Transportit Rrugor, me aktivitetin profesional të babait të tij, prokurorit të SPAK, apo me një çështje tjetër personale.
Ajo që e bën edhe më shqetësuese situatën është fakti se, deri në këto momente, nuk rezulton të jetë bërë një denoncim zyrtar në Policinë e Shkodrës për ngjarjen.
Sipas informacioneve paraprake, Gokaj nuk ka bërë kallëzim pas dhunës, ndërsa pretendohet se pas goditjes ka marrë edhe kërcënime. Këto pretendime mbeten për t’u verifikuar nga autoritetet.
Edhe drejtori rajonal i Transportit Rrugor, Gert Haka, i cili sapo është emëruar në këtë detyrë, si dhe punonjës të tjerë që dyshohet se kanë qenë dëshmitarë të ngjarjes, nuk kanë referuar rastin në polici.
Ngjarja mësohet të jetë regjistruar nga kamerat e sigurisë së institucionit. Pamjet filmike mund të jenë një nga provat kryesore për të dokumentuar dinamikën e konfliktit dhe identifikuar personat që kanë ushtruar dhunë.
Dhuna brenda një institucioni publik, në mes të ditës dhe në prani të qytetarëve, ka shkaktuar alarm te personat që ndodheshin në ambientet e drejtorisë në momentin e incidentit.
Tashmë pritet të shihet nëse Policia e Shkodrës do të nisë verifikimet për këtë ngjarje dhe nëse do të merren pamjet e kamerave të sigurisë për të sqaruar rrethanat, motivin dhe përgjegjësinë e personave të përfshirë.
Deri në një reagim zyrtar.Burimi NORTHPRESS.al