Një aksident tragjik i ka prerë jetën në mes gazetarit 26-vjeçar, Xhesjon Zogu. I riu humbi jetën ditën e sotme në një aksident të rëndë rrugor të regjistruar në aksin Fushë Krujë-Rinas, mbi urën e Gjolës.
Përplasja mes dy automjeteve ka rezultuar fatale për gazetarin, i cili udhëtonte me një automjet tip “Land Rover”. Pavarësisht përpjekjeve për t’i dhënë ndihmën e nevojshme dhe transportimit drejt Spitalit të Traumës, Xhesjon nuk ka mundur t’u mbijetojë plagëve të marra dhe ka ndërruar jetë gjatë rrugës.
Në aksident ka mbetur i plagosur edhe një tjetër person, Behar Ruçi, nga Korça, i cili udhëtonte me një automjet tip “Benz”. Ai është transportuar për në spital, ku po merr trajtimin e nevojshëm mjekësor.
Nga të dhënat paraprake dyshohet se përplasja ka ndodhur si pasojë e një parakalimi të gabuar nga drejtuesi i automjetit “Benz”. Manovra dyshohet se ka sjellë përplasjen me “Land Rover”-in me të cilin udhëtonte 26-vjeçari.
Në vendngjarje kanë mbërritur shërbimet e Policisë, të cilat kanë nisur hetimet për të përcaktuar me saktësi dinamikën e aksidentit.
Xhesjon, ka qenë një nxënës ekselent dhe një i ri me pasion të madh për gazetarinë. Dashuria për këtë profesion e kishte shtyrë të ndiqte rrugën e informimit, të raportimit dhe të përcillte te publiku ngjarjet që ndodhnin çdo ditë.
Në moshën vetëm 26-vjeçare, Xhesjoni kishte përpara një jetë me ëndrra, plane dhe ambicie në fushën e gazetarisë. Një jetë që sot u ndërpre papritur, duke lënë pas dhimbje dhe pikëllim te familjarët, miqtë, kolegët dhe të gjithë ata që e njihnin.
