Ministrja e Shtetit për Marrëdhëniet me Parlamentin, Erjona Ismaili, ka vendosur të largohet nga postin i bashkëkryetares së Partisë Socialiste në degën e Vlorës, detyrë të cilën e mbante prej 1 viti e 3 muajsh.
Lajmin e ka bërë të ditur vetë ajo përmes një mesazhi të ndarë në rrjetet sociale. Ismaili sqaroi se dorëheqja vjen në kuadër të fazës përfundimtare të riorganizimit të strukturave të PS-së, me qëllim që t’i çelet rruga procesit demokratik për zgjedhjen e drejtuesve të rinj në degën e Vlorës.
Përgjatë kësaj periudhe, ajo e cilësoi drejtimin e kësaj dege si një përgjegjësi të lartë të besuar nga kryetari i partisë, Edi Rama, duke nënvizuar se ka dhënë maksimumin me përkushtim, korrektësi dhe integritet.
Në mbyllje të mesazhit të saj, ministrja shprehu një falënderim të ngrohtë për të gjithë anëtarët, drejtuesit dhe bashkëpunëtorët socialistë në Vlorë për mbështetjen e vazhdueshme, duke e vlerësuar këtë përvojë si një nga kapitujt më të rëndësishëm në rrugëtimin e saj politik.