Humbja tragjike e djalit të familjes Arapi, i cili vdiq nga një aksident me motor para dy vitesh, ka lënë pas një plagë të pashërueshme për familjen e tij të vogël e dy prindërit e moshuar.
Të ndodhur përballë tragjedisë kur djali iu vdiq në lule të rinisë, vetëm 32 vjeç, babai i të riut, Frrok Arapi shtrin dorën te shqiptarët duke kërkuar që ta ndihmojnë për të pasur të ardhura të mjaftueshme, që të mundësojë një jetesë normale për fëmijët e 32-vjeçarit, të cilët jetojnë me mamanë e tyre me qira.
Në një intervistë të dhënë për “News24” kryefamiljari Frrok Arapi i bën thirrje çdo shqiptari që të kontribuojë në të mirën e nipit dhe mbesës së tij, të cilët jetojnë me qira bashkë me nënën e tyre, e të ardhurat që kanë janë të pamjaftueshme për të mbyllur muajin.
“Kam pasur një fatkeqësi para dy vitesh, më ka vdekur djali në aksident. Më ka lënë djalë e vajzë e nuse. Më morën shokët në telefon më thanë është bërë aksident djali. Shkuam në vendngjarje, çfarë të shikoje, djali ishte copëtuar fare.
Unë jam i sëmurë bashkë me gruan, djali punonte ishte shumë punëtore, ka qenë me të gjitha të mirat, mirëpo ishte fatkeqësia jonë, vdiq në moshën kur ne e fëmijët e tij kishim më së shumti nevojë për të. Unë me gruan mundohemi. Vijmë çdo ditë e interesohemi për fëmijët. Unë shes gjakun e fëmijët nuk i lë. Nipi e mbesa bashkë me nënë e tyre janë me shtëpi me qira në pallat, 150 mijë lekë. Të ardhurat e tyre janë 79 mijë lekë të vjetra, janë me borxhe” është shprehur Frrok Arapi në intervistë.
Kushdo që ka dëshirë dhe mundësinë për të kontribuar në krijimin e një jetese normale për dy fëmijë që para dy vitesh humbën babanë e tyre, mund të kontaktojë në numrin e gjyshërve të tyre, Frrok Arapit: 0675838973.