Një ditë pas krimit të rëndë të ndodhur në fshatin Vidhishtë që tronditi mëngjesin e djeshëm mbarë vendin, kanë dalë pamjet nga situata aktuale brenda shtëpisë së familjes Plaka, të cilët sot varrosën dy kryefamiljarët e tyre.
Siç mund ta shikoni dhe në videon e mëposhtme të publikuar nga newsbomb.al, vërehet qartazi kaosi i mbetur brenda banesës një katëshe të familjes Plaka.
Me të mbërritur në shtëpinë e tyre me çifte në dorë, autori Refit Buzi dyshohet të ketë goditur derën kryesore të banesës.
Xhami i derës kryesore e pjata të thyera shikohen në dyshemenë e shtëpisë. Ndërsa pamjet nga dhomat e gjumit tregojnë gjëra të rregulluara, të vendosura në vendet e tyre, duke nxjerrë në pah detajin të cilën raportuam mesditën e sotme: çifti Plaka sa ishte përgatitur për të dalë nga banesa e për të vijuar në punë.
Teksa heshtja e zia kanë zaptuar rrugët e fshatit Vidhishtë, pas varrimit të dy kryefamiljarëve të familjes Plaka, nesër pritet t’i jepet lamtumira e fundit autorit të krimit të trefishtë që shokoi mbarë vendin.
