Një aksident i rëndë ka tr*nditur provincën Vorarlberg të Austrisë, ku një 41-vjeçar dhe vajza e tij 6-vjeçare humbën jetën pasi traktori me të cilin po udhëtonin u përmbys në një terren të pjerrët. Vajza tjetër e familjes, vetëm 4 vjeçe, i mbijetoi për mrekulli tr*gjedisë.
Sipas autoriteteve, babai po drejtonte një traktor me rimorkio, ku ndodheshin edhe dy vajzat e tij. Dyshohet se mjeti rrëshqiti në një shpat me bar dhe u përmbys në një zonë të vështirë për t’u arritur.
Meqenëse aksidenti ndodhi në një vend të izoluar, askush nuk e kuptoi menjëherë se çfarë kishte ndodhur. E shqetësuar që bashkëshorti dhe vajzat nuk po ktheheshin në shtëpi, nëna vendosi të nisej vetë në kërkim të tyre.
Kur mbërriti në vendngjarje, ajo u përball me një skenë rrëqethëse dhe njoftoi menjëherë shërbimet e emergjencës.
Mjekët, pas mbërritjes, vetëm sa konstatuan vd*kjen e babait dhe vajzës 6-vjeçare. Ndërkohë, vajza 4-vjeçare kishte pësuar lëndime dhe, pasi mori ndihmën e parë në vendngjarje, u transportua me helikopter mjekësor në spitalin rajonal të Feldkirch.
Ngjarja ka prekur rëndë edhe ekipet e shpëtimit. Zjarrfikësit vullnetarë të zonës e njihnin personalisht familjen e viktimave dhe, për shkak të tronditjes emocionale, nxjerrja e trupave u krye nga një njësi zjarrfikëse e një komune fqinje.
“Ka ndërhyrje që na lënë pa fjalë”, shkruan zjarrfikësit në një mesazh prekës të publikuar në rrjetet sociale.
