Një aksident me disa automjete ka ndodhur pasditen e së shtunës në aksin nacional Shkodër–Tiranë, duke shkaktuar lëndime tek disa persona, mes tyre edhe një efektiv i Policisë së Shkodrës.
Sipas informacioneve paraprake, në ngjarje janë përfshirë tre automjete. Përplasja ka qenë e fortë, por fatmirësisht nuk raportohet për viktima. Personat e lënduar janë transportuar në spital dhe ndodhen jashtë rrezikut për jetën.
Për shkak se ndër të plagosurit është edhe një punonjës policie, hetimet nuk po kryhen nga strukturat e policisë rrugore, por janë marrë në dorë nga Prokuroria e Shkodrës, e cila pritet të analizojë dinamikën dhe shkaqet e aksidentit.
Ndërkohë, grupi hetimor po mbledh provat në vendngjarje dhe po punon për të përcaktuar përgjegjësitë e secilit prej drejtuesve të mjeteve të përfshira.