Prokuroria pranë Gjykatës së Shkallës së Parë të Juridiksionit të Përgjithshëm Fier ka dhënë detaje tronditëse rreth vrasjes së 56-vjeçarit Anesti Rama. Sipas hetimeve të para, dyshohet se viktima u dhunua dhe u mbyt me tel nga vajza e tij, Emalinda Rama, dhe i dashuri i saj, Çlirim Dogani.
Rrjedha e Ngjarjes sipas Prokurorisë
Në njoftimin zyrtar, Prokuroria bën me dije se hetimi penal është regjistruar për veprat penale “Vrasja për shkak të marrëdhënieve familjare” dhe “Veprime që pengojnë zbulimin e së vërtetës”. Tre persona janë vënë nën hetim: Emalinda Rama, Çlirim Dogani dhe bashkëshortja e viktimës, V.R.
Ngjarja filloi me një telefonatë urgjente për ndihmë mjekësore. Kur personeli i ambulancës mbërriti, gjetën 56-vjeçarin të shtrirë në sallonin e banesës, tashmë pa jetë. Nga këqyrja e jashtme e trupit u konstatuan çarje dhe dërmishje në pjesën ballore dhe mbi vetulla.
Përpjekja për të fshehur krimin
Sipas Prokurorisë, Emalinda Rama dhe V.R. deklaruan se e kishin gjetur viktimën të rrëzuar në tualet. Megjithatë, dyshimet u rritën pas zbulimit se ato kishin lëvizur trupin, e kishin pastruar, veshur dhe kishin fshirë vendin e ngjarjes, me qëllim që të kryenin ritet mortore dhe të pengonin zbulimin e të vërtetës.
Arrestimet dhe masa e sigurisë
Pas veprimeve hetimore, u bë arrestimi në flagrancë i Emalinda Ramës dhe ndalimi i Çlirim Doganit për “vrasje për shkak të marrëdhënieve familjare”, e kryer në bashkëpunim. Bashkëshortja e viktimës, V.R., u arrestua për “veprime që pengojnë zbulimin e së vërtetës”. Gjykata ka pranuar kërkesën e Prokurorisë dhe ka caktuar masën e sigurisë “arrest në burg” për të tre personat.
Prokuroria ka shprehur angazhimin e plotë për të vënë para përgjegjësisë ligjore të gjithë personat që kryejnë vepra penale kundër jetës.