Gazetarja Klodiana Lala, e ftuar në emisionin “Të Paekspozuarit” në MCN TV, ka zbuluar detaje të reja lidhur me hetimet e Prokurorisë së Posaçme (SPAK) dhe Prokurorisë së Tiranës, duke konfirmuar se ministri aktual Arbjan Mazniku është person nën hetim.
Lala sqaroi se njoftimi i mëparshëm i SPAK-ut për një ministër nën hetim i referohej ish-zv/kryeministrit Arben Ahmetaj, duke theksuar se hetimi ndaj tij kishte nisur kur ai mbante ende funksionin ministerial. Ajo shtoi se ka edhe ministra aktualë që janë nën hetim, por emrat e tyre nuk bëhen publikë.
Dosja Ndaj Ministrit Mazniku i Kalon SPAK-ut
Megjithatë, gazetarja Lala konfirmoi se Prokuroria e Tiranës ka njoftuar se ministri Arbjan Mazniku është person nën hetim. Akuzat ndaj tij janë shpërdorim detyre dhe shkelje e barazisë në tendera. Kjo dosje i është kaluar tashmë për kompetencë Prokurorisë së Posaçme.
Rasti lidhet me një denoncim të bërë publik nga Belind Këlliçi në vitin 2023, kur ai kandidonte për kryetar të Bashkisë së Tiranës. Këlliçi denoncoi atëherë Bashkinë e Tiranës për ndërtimin e një rruge pa tender, me tenderin që u zhvillua vetëm pasi asfalti ishte shtruar. Prokuroria e Tiranës konstatoi se kryebashkiaku Veliaj kishte deleguar firmën dhe përgjegjësia rezultoi tek Arbjan Mazniku, i cili në atë kohë ishte nënkryetar bashkie dhe çështja nuk ishte nën kompetencën e SPAK-ut.
Pas emërimit të Maznikut si ministër, Prokuroria e Tiranës e thirri atë për t’u marrë në pyetje rreth 3-4 javë para zgjedhjeve parlamentare. Tani, me konfirmimin e Prokurorisë së Tiranës, SPAK do të regjistrojë Maznikun si person nën hetim dhe do të vazhdojë hetimin, duke grupuar edhe të dhëna të tjera që mund të dalin gjatë procesit.