Ambasada e Shteteve të Bashkuara në Tiranë ka reaguar më në fund lidhur me zgjedhjet parlamentare të 11 majit, përmes një deklarate të shkurtër në rrjetet sociale. Por ajo që bie menjëherë në sy është fakti se deklarata nuk përmend asnjë palë politike – as fituesit, as humbësit – por drejtohet ekskluzivisht tek qytetarët shqiptarë.
“Urojmë popullin e Shqipërisë për zgjedhjet parlamentare dhe presim të vazhdojmë partneritetin tonë të ngushtë me Shqipërinë”, thuhet në postim.
Ky mesazh neutral, thuajse ceremonial, ka ngjallur menjëherë reagime të heshtura në skenën politike. Deri tani, asnjë parti politike – as nga mazhoranca dhe as nga opozita – nuk ka bërë një deklaratë zyrtare në lidhje me urimin e ambasadës, ndryshe nga praktikat e mëparshme ku çdo reagim amerikan është interpretuar si mbështetje e drejtpërdrejtë për njërën palë.
Në fakt, kjo deklaratë ngjan më shumë me një mesazh të rastësishëm urimi për një ngjarje pa shumë rëndësi sesa me një vlerësim serioz për një proces elektoral. Me tone të përmbajtura, të rezervuara dhe pa asnjë fjalë të ngrohtë për zhvillimin apo standardin e zgjedhjeve, deklarata lë të kuptohet se SHBA ka zgjedhur të mbajë një distancë të ftohtë nga të gjithë aktorët politikë në vend.
Kjo heshtje diplomatike ndaj partive mund të jetë një sinjal zhgënjimi. Për muaj me radhë, ambasada u mbajt e rezervuar për procesin zgjedhor, ndërkohë që partitë politike në Shqipëri përpiqeshin ta përfshijnë SHBA-në në debatin e brendshëm, secila duke pretenduar mbështetjen e saj. Tani që reagimi më në fund erdhi, ai ngjan më shumë si një mesazh simbolik për qytetarët dhe një shuplakë e heshtur për klasën politike.
Analistët parashikojnë që si mazhoranca ashtu edhe opozita do përpiqen në ditët në vijim ta interpretojnë këtë deklaratë si një shenjë që i favorizon, por në të vërtetë, ajo që vërehet është zhgënjimi i qartë amerikan me mënyrën si u zhvilluan zgjedhjet dhe me aktorët që i dominuan ato. Ndër rreshta, mund të lexohet edhe një mesazh i nënkuptuar që SHBA mbështet më fort nismat dhe lëvizjet e reja politike, larg polarizimit të stërkonsumuar të skenës aktuale shqiptare.