Bardhi Demiraj, babai i 11-vjeçarit Dior Demiraj, i cili mbeti i plagosur rëndë gjatë atentatit mafioz të ndodhur ditë më parë në zonën e Lundrës, ka folur për herë të parë publikisht mbi ngjarjen tronditëse dhe mbi gjendjen aktuale të djalit të tij.
I ftuar në emisionin “Opinion”, Demiraj rrëfeu momentet dramatike pas sulmit me armë, kur mori vetë fëmijët e plagosur dhe i transportoi me makinë drejt Spitalit të Traumës. Ai tregoi se ndërhyrja e shpejtë ishte vendimtare për shpëtimin e jetës së të birit, i cili ishte plagosur me katër plumba.
“Fëmijët i mora unë vetë dhe i çova me fuoristradën time në Spitalin e Traumës. Nëse do të prisja edhe një minutë më shumë, djali i vogël nuk do të ishte më gjallë. Kishte marrë dy plumba në trup dhe dy të tjerë në dorën e majtë,” deklaroi Demiraj me zërin që i dridhej nga emocioni.
Ai bëri të ditur se aktualisht ndodhet me fëmijët në Itali, ku Diori dhe vëllai i tij, Marko, 17 vjeç, po marrin trajtim të specializuar në një spital të njohur. Ndërkohë që Diori paraqitet në gjendje të rëndë, mjekët po bëjnë të pamundurën për të stabilizuar situatën e tij.
Atentati ndaj makinës që transportonte fëmijët e familjes Demiraj dhe mikun e tyre, që po ktheheshin nga një festë ditëlindjeje, tronditi opinionin publik dhe solli në qendër të vëmendjes nivelin alarmant të dhunës mafioze që nuk kursen më as fëmijët.
Bardhi Demiraj bëri apel për drejtësi dhe theksoi se askush nuk duhet të përjetojë atë që po kalon ai dhe familja e tij. Ai falënderoi mjekët që ndihmuan në momentet e para dhe autoritetet italiane për gatishmërinë për të pranuar fëmijët për trajtim.
“Jam vetëm një baba që do të shohë fëmijën e vet të ngrihet përsëri në këmbë,” përfundoi ai.