Avokati i njohur shqiptar, Saimir Vishaj, ndodhet aktualisht në gjendje kritike për jetën në Spitalin e Traumës në Tiranë, ku po përballet me një tjetër betejë të ashpër shëndetësore. Sipas burimeve, Vishaj pësoi një incident të rëndë dy ditë më parë pasi u rrëzua nga shkallët. Gjatë orëve të fundit gjendja e tij është përkeqësuar ndjeshëm, çka ka detyruar ekipet mjekësore ta futin menjëherë në intubim brenda repartit të reanimacionit.
Kjo ngjarje e rëndë vjen si një goditje e njëpasnjëshme për avokatin, i cili vetëm pak muaj më parë kishte kaluar një sprovë tjetër dramatike. Vishaj pati rrëfyer publikisht përballjen me një sëmundje të rëndë që i rrezikoi seriozisht jetën dhe e mbajti larg aktivitetit për disa kohë. Falë përkujdesjes mjekësore dhe forcës së tij karakteristike, ai arriti t’i mbijetonte asaj përbaljeje të vështirë, duke u rikthyer sërish në jetën publike.
Përveç sfidave me shëndetin, vitet e fundit kanë qenë të ngarkuara për të edhe në aspektin personal. Jeta e tij private u përball me tronditje pas ndarjes nga bashkëshortja, një ngjarje që u përjetua me mjaft dhimbje e maturi prej tij, por që tërhoqi vëmendjen e medias për shkak të profilit të tij të lartë publik. Pavarësisht goditjeve personale dhe ngarkesës emocionale, Vishaj u përpoq të ruante balancën dhe t’i përkushtohej punës.
Në rrugëtimin e tij profesional, Saimir Vishaj njihet si një nga figurat më të spikatura të jurisprudencës në vend. Si kryetar i Shoqatës së Avokatëve Penalistë të Shqipërisë, ai ka udhëhequr mbrojtjen në çështje të shumta të bujshme gjyqësore dhe ka qenë një zë kritik e mjaft aktiv në debatet mbi reformën në drejtësi dhe mbrojtjen e të drejtave të njeriut.
Lajmi për aksidentin dhe përkeqësimin e gjendjes së tij ka shkaktuar shqetësim të madh te kolegët e komunitetit të juristëve, miqtë dhe opinioni publik. Të gjithë po ndjekin me ankth zhvillimet nga Spitali i Traumës, me shpresën se ai do t’ia dalë mbanë edhe në këtë përballje tejet të vështirë për jetën.
