Protestat e studentëve që po zhvillohen prej disa ditësh në Tiranë mund të ndikojnë edhe në planet televizive të Top Channel për sezonin e ri të “Big Brother VIP Albania”.
Së fundmi, kanë nisur aludimet se situata e krijuar në vend dhe vazhdimësia e protestave mund ta shtyjnë televizionin të rishikojë kalendarin e nisjes së edicionit të gjashtë të reality show-t.
Megjithatë, duhet theksuar se Top Channel nuk ka shpallur ende një datë zyrtare për premierën e “Big Brother VIP Albania 6”, ndaj për momentin nuk mund të flitet për një shtyrje të konfirmuar.
Sipas këtyre aludimeve, një nga faktorët që mund të ndikojë në vendimmarrjen e televizionit është kohëzgjatja e protestave dhe zhvillimi i situatës në javët në vijim. Nëse protestat vazhdojnë me të njëjtin intensitet, nuk përjashtohet mundësia që produksioni të marrë më shumë kohë përpara nisjes së formatit.
Një vendim i tillë do të lidhej edhe me programacionin e Top Channel, i cili gjatë ditëve të fundit ka bërë ndryshime për t’u dhënë hapësirë zhvillimeve aktuale.
Së fundmi, televizioni njoftoi se emisioni “Live me Luizin” nuk do të transmetohej në mbrëmjen e planifikuar, duke ia lënë vendin një transmetimi special të “Top Story” me Grida Dumën.
Për momentin, gjithçka mbetet në nivel spekulimesh. Nisja e “Big Brother VIP Albania 6” dhe çdo ndryshim i mundshëm në planet e produksionit pritet të bëhen të qarta vetëm pas një njoftimi zyrtar nga Top Channel.
