Protestat e studentëve në Tiranë pritet të shoqërohen nesër, më 20 tetor, edhe nga një marshim i pedagogëve, të cilët kanë vendosur të dalin në mbështetje të të rinjve dhe kundër dhunës së raportuar gjatë ditëve të fundit.
Sindikata e Punonjësve të Universiteteve të Shqipërisë (SPUSH) ka njoftuar organizimin e një marshimi solidariteti, i cili do të nisë në orën 10:00, përpara Universitetit Politeknik të Tiranës, me moton “STOP DHUNËS NDAJ STUDENTËVE”.
Në deklaratën e publikuar, sindikata shprehet se ka qenë në përkrahje të protestës studentore që prej fillimit të saj, ndërsa ngre shqetësimin për mënyrën se si policia ka ndërhyrë ndaj protestuesve.
SPUSH e cilëson pjesëmarrjen në marshim si një detyrim qytetar dhe njerëzor, duke theksuar nevojën për mbrojtjen e studentëve dhe krijimin e kushteve për dialog.
Thirrjes i është bashkuar edhe Dea Mishel, e cila ka shpërndarë njoftimin dhe u ka bërë apel prindërve dhe qytetarëve të marrin pjesë, pavarësisht bindjeve politike.
“Nuk duhet të jesh pedagog apo student për të qenë aty. Mjafton të besosh se fëmijët tanë meritojnë dinjitet, siguri dhe të drejtën për t’u shprehur. Studentët janë fëmijët tanë. Heshtja nuk është zgjidhje!”, thuhet në mesazhin e shpërndarë.
Në përshkrimin e publikimit theksohet gjithashtu se organizatorët e thirrjes nuk mbështesin dhunën dhe nuk dëshirojnë t’i shtyjnë të rinjtë drejt rrezikut, por kërkojnë të shprehin solidaritetin e tyre.
Marshimi është paralajmëruar për të martën, më 20 tetor 2026, në orën 10:00, përpara Universitetit Politeknik të Tiranës. Mbetet për t’u parë sa pedagogë, studentë dhe qytetarë do t’i përgjigjen thirrjes.
