Është publikuar fotografia e 35-vjeçarit nga Kurbini, Ferdinand Hoti., i cili u gjet pa shenja jete brenda një automjeti të përfunduar në lumin Tergola në Itali.
Trupi i 35-vjeçarit është sjellë tashmë në Shqipëri, ndërsa familja po përgatitet për ceremoninë mortore. Sipas informacioneve të publikuara, ceremonia do të zhvillohet këtë të diel në fshatin Gurrëz të Kurbinit, ku familjarët, të afërmit dhe miqtë do t’i japin lamtumirën e fundit.
Rasti vazhdon ndërkohë të jetë nën hetim nga autoritetet italiane, të cilat po përpiqen të rindërtojnë lëvizjet e 35-vjeçarit dhe atë që ka ndodhur përpara se automjeti të gjendej në lumë.
Sipas raportimeve të mediave italiane, hetuesit dyshojnë se F.H. është qëlluar me armë dhe se ngjarja mund të ketë ndodhur në provincën e Venecias, zonë ku ai jetonte.
Një prej elementeve kryesore të hetimit lidhet pikërisht me vendin ku ka ndodhur ngjarja. Autoritetet dyshojnë se San Giorgio delle Pertiche, ku është zbuluar automjeti, mund të mos jetë vendi ku 35-vjeçari ka humbur jetën.
Pista që po shqyrtohet është se automjeti dhe trupi mund të jenë transportuar më pas drejt zonës ku u gjetën, me qëllim fshehjen e gjurmëve. Kjo mbetet pjesë e hetimeve dhe ende nuk është paraqitur si një përfundim përfundimtar nga autoritetet.
Edhe vendndodhja ku u gjet automjeti ka marrë vëmendjen e hetuesve. Bëhet fjalë për një zonë me rrugë dytësore, e cila sipas raportimeve nuk është lehtësisht e identifikueshme nga persona që nuk e njohin territorin.
Për këtë arsye po shqyrtohet edhe mundësia që në ngjarje të kenë qenë të përfshirë më shumë se një person dhe që zona të jetë kontrolluar paraprakisht. Edhe kjo mbetet vetëm një pistë hetimore në këtë fazë.
Autoritetet italiane po punojnë paralelisht edhe për përcaktimin e motivit. Një prej pistave të raportuara lidhet me mosmarrëveshje të mundshme në aktivitetin me lëndë narkotike, por deri tani nuk është bërë publik ndonjë përfundim që e konfirmon këtë si motiv.
Një tjetër drejtim i hetimeve lidhet me një incident të mëparshëm të ndodhur gjatë natës mes 30 qershorit dhe 1 korrikut në Zianigo di Mirano.
Në atë rast, një tjetër shtetas shqiptar kishte mbetur i plagosur pas të shtënave pranë banesës së tij. Hetuesit po verifikojnë nëse F.H. mund të kishte ndonjë lidhje me personat e përfshirë në atë ngjarje.
Deri më tani, megjithatë, nuk raportohet se autoritetet italiane kanë siguruar prova konkrete që lidhin drejtpërdrejt dy rastet. Për këtë arsye, pista po verifikohet së bashku me mundësi të tjera dhe nuk mund të konsiderohet ende si motiv i konfirmuar.