Sipas ish-hulumtueses së Tribunalit të Hagës për ish-Jugosllavinë, Nevenka Tromp, dënimi prej 25 vjetësh për ish-Presidentin e Kosovës, Hashim Thaçi në Gjykatë Speciale, “është praktikisht dënim i përjetshëm”.
“Unë u trondita nga ajo që e konsiderova mizorinë e gjyqtarit kryesues, Charles Smith, kur ai përmendi tri gjëra që, sipas meje, ilustrojnë thelbin e pyetjes suaj. Si do të lidhet rekordi historik dhe drejtësia tranzicionale pas luftës me faktin se një ish-drejtues i UÇK-së dhe ish-president i Kosovës është dënuar me 25 vjet burg? Kjo, de facto, për një president si Thaçi, i cili tashmë është në të 60-at, nënkupton një dënim të përjetshëm”, thotë ajo.
“Dhe përballë kësaj, nuk pati asnjë president të palës serbe, madje asnjë politikan, me përjashtim të Sainoviçit, i cili ishte krahu i djathtë i Millosheviçit kur bëhet fjalë për krimet në Kosovë”, shton.
Siç tha Tromp, Presidentët tjerë në shtetet ku situata është e brishtë, siç është rasti i atij të Ukrainës, Volodymyr Zelensky, “duhet të shqetësohen”.
“A mund ta imagjinoni? Një president i një shteti të mëparshëm, ish-presidenti i Kosovës, ndihmon në krijimin e kësaj gjykate dhe më pas akuzohet, gjykohet dhe dënohet me atë që, për shkak të moshës së tij, mund të jetë praktikisht burgim i përjetshëm. Dhe ju e dini, presidentët e tjerë që po e shohin këtë nga shtete ku situata është gjithashtu shumë e brishtë – po flas për Ukrainën dhe Zelenskyn – duhet të shqetësohen për këtë”, shtoi Tromp.
Hashim Thaçi, Kadri Veseli, Rexhep Selimi e Jakup Krasniqi u dënuan me 81 vjet heqje lirie në total nga Gjykata Speciale.
Vendimi i së mërkurës, lexuar nga kryegjyqtari, Charles Smith, dha 25 vjet burg për Thaçin, 25 për Jakup Krasniqin, 18 për Kadri Veselin e 13 për Rexhep Selimin.