Një aksident i rëndë ka ndodhur mesditën e sotme në hyrje të tunelit nënujor të Aktionit, në anën e Prevezës, në Greqi.
Në aksident janë përfshirë një kamion dhe tre automjete, ndërsa tetë persona kanë mbetur të plagosur.
Të plagosurit janë katër burra, dy gra dhe dy fëmijë. Ata janë transportuar me ambulanca të EKAB drejt Spitalit të Prevezës. Sipas informacioneve paraprake, asnjë prej tyre nuk ndodhet në rrezik për jetën.
Përplasja ka qenë e fortë dhe ka shkaktuar dëme të konsiderueshme në të katër automjetet. Tre prej makinave të përfshira kishin targa të huaja, përkatësisht të Italisë, Gjermanisë dhe Rumanisë.
Sipas të dhënave paraprake, kamioni me targa greke, i drejtuar nga një shtetas grek, ka përplasur tre automjetet e tjera, duke i tërhequr për disa metra dhe duke shkaktuar një përplasje të shumëfishtë. Rrethanat e sakta të aksidentit janë ende duke u hetuar.
Për shkak të përplasjes së fuqishme, në vendngjarje u mobilizua menjëherë shërbimi zjarrfikës i Prevezës. Forcat zjarrfikëse zhvilluan një operacion për nxjerrjen e tre personave që kishin mbetur të bllokuar në automjete.
Pas nxjerrjes së tyre, të plagosurit iu dorëzuan ekipeve të EKAB-it dhe u transportuan për ndihmë mjekësore në spital.