Një ngjarje e pazakontë dhe e rëndë ka marrë epilog gjyqësor në Uells, ku një 60-vjeçar është dënuar me dy vjet e katër muaj burg. Christopher Phillips u shpall fajtor nga gjykata në Cardiff pasi mbajti trupin e nënës së tij të ndjerë brenda një frigoriferi për tre vjet me radhë.
Përmes fshehjes së vdekjes së të ëmës, 89-vjeçares Sylvia Phillips, i pandehuri pëfitoi në mënyrë të paligjshme mbi 91,000 euro (rreth 78,000 paund) nga pensioni dhe ndihmat sociale që vazhdonin të kalonin në llogarinë e saj bankare.
Dinamika e ngjarjes dhe shmangia e autoriteteve
Sipas dokumenteve të paraqitura në gjykatë, e ëma kishte ndërruar jetë në mars të vitit 2023. Vetëm dy ditë pas vdekjes së saj, 60-vjeçari bleu një frigorifer të madh ngrirës, e vendosi në dhomën e ndenjes në shtëpinë e tyre në Porthcawl dhe futi trupin e të ëmës brenda.
Për të mbajtur të fshehtë ngjarjen dhe për të vazhduar marrjen e pensioneve, pagesave për kujdestarinë dhe mbështetjes për ngrohjen, Phillips ndërmori disa veprime:
-
Mashtrimi i sistemit shëndetësor: Ai vazhdoi të tërhiqte rregullisht ilaçet e përshkruara për të ëmën.
-
Shmangia e kontrolleve: Kur mjekët kërkonin vizita apo analiza, ai pretendonte se e ëma refuzonte të merrte pjesë.
-
Pengimi i procedurave: Ai nuk njoftoi as shërbimet sociale dhe as autoritetet vendore për ndarjen nga jeta të 89-vjeçares.
Mbrojtja dhe ana emocionale e ngjarjes
Gjatë seancës gjyqësore, mbrojtja e tij argumentoi se 60-vjeçari vuante nga probleme të rënda të shëndetit mendor dhe se kishte një lidhje jashtëzakonisht të fortë me nënën e tij adoptuese, me të cilën kishte bashkëjetuar për pothuajse pesë dekada.
Avokati i tij tha se i pandehuri e kishte pasur të pamundur të shkëputej prej saj emocionalisht, duke zbuluar se ai shpesh ulej pranë trupit brenda shtëpisë, i mbante dorën dhe bënte biseda të përditshme me të. Megjithatë, trupi gjykues e cilësoi mashtrimin si të mirëmenduar dhe sistematik, duke vendosur dënimin e tij me burgim.