Një tjetër aksident rrugor ka ndodhur mëngjesin e sotëm në aksin kombëtar Peqin-Rrogozhinë, vetëm pak orë pas një tjetër përplasjeje të rëndë të ndodhur në këtë zonë.
Aksidenti ka ndodhur rreth orës 09:45 pranë kryqëzimit të Gjocajt, në afërsi të Peqinit, ku dy automjete janë përplasur me njëra-tjetrën. Përplasja ka qenë e fortë, duke shkaktuar dëme të mëdha materiale, ndërsa njëra prej makinave thuajse është shkatërruar totalisht.
Sipas hetimeve paraprake, dyshohet se shkak i aksidentit është bërë futja e njërit prej mjeteve në rrugën kryesore në kundërshtim me rregullat e qarkullimit.
Si pasojë e përplasjes, një prej drejtuesve të automjeteve ka mbetur i plagosur dhe është dërguar për ndihmë mjekësore.
Në vendngjarje kanë mbërritur efektivët e policisë, të cilët kanë nisur hetimet për të përcaktuar dinamikën e plotë dhe shkaqet e aksidentit.