Një ngjarje e rëndë ka ndodhur mesditën e kësaj të diele në Korçë, ku një konflikt banal mes dy personave rrezikoi të kthehej në tragjedi. Një person ka mbetur i plagosur rëndë pasi është goditur me sëpatë.
Bëhet me dije se dy personat e përfshirë në konflikt kishin debatuar ashpër me njëri-tjetrin mbrëmjen e djeshme.
Por duket se “gjakrat” nuk janë ulur, pasi ditën e sotme ata janë takuar sërish dhe njëri prej tyre ka marrë një sëpatë, me të cilën ka goditur personin tjetër, duke i shkaktuar plagë të rënda.
I dëmtuari është transportuar me urgjencë në Spitalin Rajonal të Korçës, ku raportohet se ka marrë dëmtime të rënda në pjesën e shpatullës si pasojë e goditjes me sëpatë.
Po ashtu, raportohet se, pas ndërhyrjes së mjekëve, i dëmtuari ndodhet jashtë rrezikut për jetën, ndërsa vijon të mbahet nën monitorim.
Policia ka reaguar menjëherë dhe ka arrestuar autorin e sulmit, i cili është shoqëruar në ambientet e Komisariatit të Korçës për procedime të mëtejshme.
Ndërkohë, grupi hetimor ka mbërritur në vendngjarje dhe po kryen të gjitha veprimet për zbardhjen e plotë të rrethanave të këtij konflikti.