Protestuesit kanë paralajmëruar një tjetër aksion para Kuvendit të Shqipërisë, vetëm dy ditë pas tensioneve dhe përplasjeve me policinë që shoqëruan protestën e zhvilluar më 30 qershor.
Nga podiumi i protestës para Kryeministrisë, një prej pjesëmarrësve njoftoi se të enjten, në orën 10:00, qytetarët do të rikthehen sërish përpara Parlamentit, duke e cilësuar tubimin si një reagim ndaj, sipas tyre, dhunës së ushtruar nga policia ndaj protestuesve.
Protesta e një dite më parë u shoqërua me incidente, pasi një grup qytetarësh goditën me vezë automjetet e disa deputetëve në hyrje të Kuvendit. Më pas situata u përshkallëzua në përplasje me efektivët e Policisë së Shtetit, ndërsa disa protestues u shoqëruan në komisariat.
Organizatorët deklarojnë se aksioni do të vazhdojë edhe nesër, duke paralajmëruar se do të përpiqen të pengojnë hyrjen e deputetëve në seancë.
“Dje forcat e policisë kanë ushtruar dhunë të neveritshme, prandaj nesër të gjithë në orën 10:00 te Kuvendi. Policët të kenë kujdes, sepse qytetarët kanë në dorë t’ju pushojnë nga puna dhe t’ju çojnë në burg. Parlamenti është i yni, jo i atyre. Ju nuk na përfaqësoni, nuk përfaqësoni diasporën dhe as aspiratat tona. Nesër te Kuvendi do t’i ndalojmë të futen,” deklaroi protestuesi.
Thirrja vjen në një moment kur protesta qytetare ka hyrë në ditën e saj të 32-të, ndërsa organizatorët kanë paralajmëruar se aksionet nuk do të kufizohen vetëm te Kryeministria, por do të zhvendosen edhe përpara institucioneve të tjera që, sipas tyre, mbajnë përgjegjësi për situatën politike në vend.