Një hetim i ri i Strukturës së Posaçme Kundër Korrupsionit dhe Krimit të Organizuar (SPAK) ka zbuluar shpenzime të tjera të dyshimta që lidhin ish-presidentin Ilir Meta dhe ish-deputeten Monika Kryemadhi me korrupsionin. Sipas informacioneve të reja, SPAK dyshon se ish-çifti ka shpenzuar rreth 240 mijë dollarë përmes një karte të dytë bankare të vënë në dispozicion nga biznesmeni shqiptaro-amerikan Adrian Shatku, i cili rezulton të jetë kushëriri i Monika Kryemadhit.
Deri më tani, SPAK ka arritur të dokumentojë shpenzime në vlerën e 234,677.83 dollarësh amerikanë të kryera nga Monika Kryemadhi me kartën American Express Centurion me numër XXXX XXXXXS-31017, gjatë periudhës dhjetor 2014 – nëntor 2017. Prokuroria e Posaçme ka administruar disa letër-porosi nga disa shtete të huaja, të cilat detajojnë pagesat e kryera me këtë kartë të dytë bankare online.
Nga raportimi dymujor i SPAK për çështjen e Ilir Metës, bëhet e ditur se pagesat e kryera nga Monika Kryemadhi ishin kryesisht për blerje në dyqane veshjesh luksoze në qytete si Londër, Vjenë, Las Vegas dhe Beverly Hills. Përveç kësaj, me këtë kartë janë paguar edhe qëndrime në hotele në Londër, New York dhe Las Vegas, si dhe bileta avioni për udhëtime të ndryshme.
Në seancën gjyqësore të datës 26 qershor, e cila zgjati rreth katër orë, Ilir Meta ka mohuar të ketë ndonjë lidhje me këtë kartë bankare dhe ka tentuar të distancohet nga veprimet e ish-bashkëshortes së tij. Kreu i Partisë së Lirisë ka deklaruar para Gjykatës se mban përgjegjësi vetëm për veprimet e tij personale dhe jo për ato të Monika Kryemadhit. Madje, Meta ka zbuluar se kjo kartë ka qenë një nga arsyet e ndarjes së tij nga Kryemadhi, duke pretenduar se ai kishte marrë vesh për veprimet e saj korruptive pas kontrolleve të SPAK në banesën e tyre.
SPAK dyshon se vlera totale e shpenzimeve mund të jetë edhe më e lartë se ajo e dokumentuar deri tani, dhe për këtë arsye priten të tjera letër-porosi nga autoritetet e huaja. Ky zbulim i ri vjen në kuadër të hetimeve të gjera që SPAK po zhvillon ndaj Ilir Metës dhe Monika Kryemadhit për akuza të ndryshme korrupsioni, pastrim parash dhe fshehje të pasurisë. Sipas raportimeve të mëparshme, të dy janë zyrtarisht nën hetim për këto akuza dhe rrezikojnë dënime të rënda me burg nëse shpallen fajtorë.